“முடிஞ்சா வாபாஸ் வாங்கி பாருங்கள்”: கம்யூனிஸ்ட்டுகளுக்கு மூத்த பத்திரிகையாளர் மணி பகிரங்கச் சவால்!

கம்யூனிஸ்ட் கட்சிகள் ஆளும் தவெக அரசுக்குத் தினமும் குடைச்சல் கொடுத்துக் கொண்டிருப்பதாகவும், முடிந்தால் தங்கள் ஆதரவை வாபஸ் வாங்கிப் பார்க்கட்டும் என்றும் மூத்த பத்திரிகையாளர் மணி பகிரங்கச் சவால் விடுத்துள்ளார். ஊடக விவாதத்தில் பேசிய அவர், ஆதரவை வாபஸ் பெற்றால் என்னவாகும் என்று கம்யூனிஸ்ட்டுகள் கேட்கிறார்கள் என்றும், முடிந்தால் வாபஸ் வாங்கித்தான் பார்க்கட்டுமே எனத் தான் சவால் விடுப்பதாகவும் குறிப்பிட்டார்.

மேலும், அத்தகைய முடிவை அவர்களால் ஒருபோதும் எடுக்க முடியாது என்றும், ஆட்சியின் போக்கு மற்றும் அதிகாரத்தின் மீது அவர்களுக்கு எந்தவிதமான உண்மையான செல்வாக்கோ அதிகாரமோ கிடையாது என்றும் அவர் கடுமையாகச் சாடியுள்ளார்.

ஆளும் தவெக அரசுக்குச் சட்டமன்றத்திலும் வெளியிலும் தோழமைக் கட்சிகளான கம்யூனிஸ்ட்டுகள் தொடர்ந்து பல்வேறு விவகாரங்களில் அழுத்தம் கொடுத்து வரும் சூழலில், பத்திரிகையாளர் மணியின் இந்த அதிரடி பேச்சு அரசியல் வட்டாரத்தில் புதிய விவாதத்தைக் கிளப்பியுள்ளது.

அரசுக்கு எதிராக அறிக்கைப் போர்களையும் விமர்சனங்களையும் மட்டுமே முன்வைக்கும் இடதுசாரிகள், ஆட்சியைத் தீர்மானிக்கும் அளவிற்குத் தங்களின் அரசியல் முடிவை எட்டத் தயங்குவதையே இது வெளிப்படுத்துகிறது.

அரசின் கொள்கை விலகல்களைக் கண்டிப்பதாகக் காட்டிக் கொள்ளும் அதேநேரத்தில், ஆதரவை விலக்கிக் கொள்ளும் துணிச்சல் அவர்களுக்கு இல்லை என்ற விமர்சனம் நடுநிலையாளர்கள் மத்தியிலும் நிலவுகிறது.

ஒருபுறம் அரசுக்கு நெருக்கடி தருவது போல் தோற்றமளித்துவிட்டு, மறுபுறம் அதிகார மேடைகளில் தங்களுக்கான இடத்தை இழக்க விரும்பாது செயல்படும் கூட்டணிக் கட்சிகளின் இரட்டை நிலையை இத்தகைய விமர்சனங்கள் தோலுரித்துக் காட்டுகின்றன.

கம்யூனிஸ்ட்டுகளின் இந்த அரசியல் நகர்வுகள் வெறும் மக்கள் கண் துடைப்பா அல்லது கொள்கை ரீதியான முரண்பாடா என்ற கேள்வி தற்போது வலுத்துள்ளது.

Leave a Comment