முட்டாள்களுக்குப் பதில் சொல்லி நேரத்தை வீணடிக்காதீர்கள் – ரசிகர்களுக்கு நடிகர் சூர்யா கொடுத்த அதிரடி அட்வைஸ்!

திரைத்துறையில் தனது சிறப்பான நடிப்பாலும், சமூக அக்கறையுள்ள கருத்துகளாலும் தொடர்ந்து கவனத்தை ஈர்த்து வரும் நடிகர் சூர்யா, சமீபத்தில் நடைபெற்ற ரசிகர்கள் சந்திப்பில் பங்கேற்றுப் பேசினார். இந்தச் சந்திப்பில், சமூக வலைதளங்களில் நடக்கும் வீண் விவாதங்கள் மற்றும் எதிர்மறைக் கருத்துகள் குறித்துத் தனது மனதைத் திறந்துப் பேசிய பேச்சு இப்போது இணையத்தில் வைரலாகி வருகிறது.

இன்றைய இணைய உலகத்தில் நிலவும் தேவையில்லாத சர்ச்சைகள் குறித்துப் பேசிய சூர்யா, “சமூக வலைதளங்களில் ஒரு முட்டாள் ஒரு பதிவைப் போட்டதற்கு நாமளும் பதில் சொல்லிக்கொண்டிருந்தால், முடிவில் நாமும் முட்டாளாகிவிடுவோம்” என்று மிகவும் வெளிப்படையாகத் தெரிவித்தார். மேலும், “எதிர்மறையாகப் பதிவிடுபவர்களுக்குப் புரியவைக்கணும் அல்லது அவர்களை மாற்றணும் என நாம் நினைத்தால், அது ரொம்பக் கஷ்டமான விஷயம்; அவர்கள் அவங்களாகவே இருக்கட்டும்” என்று கூறி, தேவையில்லாத நபர் மீது நேரத்தைச் செலவிடுவதைத் தவிர்க்குமாறு அறிவுறுத்தினார்.

ரசிகர்களின் ஆற்றலையும் நேரத்தையும் நல்வழியில் பயன்படுத்த வேண்டும் என்பதை வலியுறுத்திய அவர், “நாம் சொல்வது சில பேருக்குப் புரியும், பலருக்குப் புரியாது. எனவே, உங்கள் ஆற்றலை அவர்களிடம் வீணடிக்க வேண்டாம்” என்று நெகிழ்ச்சியுடன் கேட்டுக்கொண்டார்.

சமூக வலைதளங்களில் தேவையில்லாத விவாதங்களிலும், பிறர் மீதான தேவையற்ற தாக்குதல்களிலும் ரசிகர்கள் தங்கள் பொன்னான நேரத்தைச் செலவிடக் கூடாது என்பதே சூர்யாவின் இந்த அன்பான வேண்டுகோளின் நோக்கம். நேர்மறையான எண்ணங்களை வளர்த்துக்கொண்டு, தங்களின் சொந்த வாழ்க்கையிலும் இலக்குகளிலும் கவனம் செலுத்த வேண்டும் என்ற சூர்யாவின் இந்த யதார்த்தமான அறிவுரை, ரசிகர்கள் மத்தியிலும் பொதுமக்கள் மத்தியிலும் பெரும் வரவேற்பைப் பெற்றுள்ளது.

Leave a Comment