தமிழகத்தில் டாஸ்மாக் மது கடைகள் மற்றும் மது அருந்துவோர் தொடர்பான செய்திகள் பொதுவெளியில் தொடர்ந்து பரபரப்பை ஏற்படுத்தி வரும் நிலையில், தமிழ்நாடு மது குடிப்போர் விழிப்புணர்வு சங்கம் வெளியிட்டுள்ள அதிரடி கோரிக்கை ஒன்று பெரும் அதிர்வலையை உருவாக்கியுள்ளது. டாஸ்மாக் பணியாளர்களைப் போல மது அருந்துவோருக்கும் அரசு சார்பில் சீருடை (Uniform) வழங்க வேண்டும் என்று இந்தச் சங்கம் கோரிக்கை விடுத்துள்ளது.
இந்த வினோதமான மற்றும் அதிரடிக் கோரிக்கை குறித்துப் பேசிய சங்கத்தின் தலைவர் செல்லப்பாண்டியன், மது அருந்துவோரின் பழக்க வழக்கங்களுக்கு ஏற்ப நிற வாரியாகச் சீருடைகள் வழங்க வேண்டும் என்று வேண்டுகோள் விடுத்துள்ளார்.
தினமும் மது அருந்துவோருக்கு பழுப்பு நிறம் (Brown), ரெஸ்டோ பார் மற்றும் மனமகிழ் மன்றங்களில் அருந்துவோருக்குப் பச்சை நிறம் (Green), எப்போதும் இல்லாமல் எப்போதாவது அருந்துவோருக்கு இளஞ்சிவப்பு நிறம் (Pink) எனச் சீருடை வழங்க வேண்டும் என்று அவர் விரிவாகக் குறிப்பிட்டுள்ளார்.
மது அருந்துவோரின் அடையாளங்கள் மற்றும் வகைப்பாட்டைச் சுட்டிக்காட்டி இந்தக் கோரிக்கை முன்வைக்கப்பட்டிருந்தாலும், இது பொதுவெளியில் பெரும் ஆச்சரியத்தையும் சிரிப்பையும் ஏற்படுத்தியுள்ளது. இணையத்தில் இந்தச் செய்தி வெளியான உடனே, “மதுப்பிரியர்களுக்குச் சீருடையா?” என்ற கேள்வியுடன் சமூக வலைதளங்களில் இது வைரலாகி வருகிறது.
சங்கத்தின் தலைவர் செல்லப்பாண்டியனின் இந்த அதிரடி வேண்டுகோள், பொதுமக்கள் மற்றும் அரசியல் வட்டாரங்களில் தற்போது சுவாரஸ்யமான விவாதப் பொருளாக மாறியுள்ளது.