சட்டப்பேரவைத் தேர்தலில் வெற்றியை இலக்காகக் கொண்டு, சமாஜ்வாதி கட்சித் தலைவர் அகிலேஷ் யாதவ் தலைமையில் புதிய தேர்தல் வியூகம் வகுக்கப்பட்டுள்ளது. இதன்படி, மாநிலத்தில் உள்ள ஒவ்வொரு வாக்குச்சாவடி நிலை முகவரும் (BLA – Booth Level Agent) தங்கள் பகுதிக்கு உட்பட்டு குறைந்தபட்சம் 5 புதிய வாக்குகளையாவது சேர்க்க வேண்டும் எனச் சமாஜ்வாதி கட்சித் தலைமை உறுப்பினர்களுக்குக் கடுமையான அறிவுறுத்தல்களை வழங்கியுள்ளது.
வாக்குச்சாவடி அளவில் கட்சியின் அடித்தளத்தைப் பலப்படுத்துவதற்காக இக்கட்சி இத்தகைய நுணுக்கமான திட்டத்தைக் கையிலெடுத்துள்ளது.
உத்தரப் பிரதேச மாநிலத்தில் உள்ள மொத்தம் 403 சட்டமன்றத் தொகுதிகளிலும் சுமார் 1.77 லட்சம் வாக்குச்சாவடிகள் அமைந்துள்ளன. இந்த ஒவ்வொரு வாக்குச்சாவடியிலும் குறைந்தபட்ச புதிய வாக்குகளை உறுதி செய்வதன் மூலம், கடந்த தேர்தலை விடக் கூடுதலாக 9 லட்சம் வாக்குகளைப் பெற முடியும் எனச் சமாஜ்வாதி கட்சி கணக்கிட்டுள்ளது.
அடிமட்ட அளவிலான வாக்காளர் சேர்ப்பு மற்றும் வாக்குச் சாவடி மேலாண்மை மூலமாக மட்டுமே பெரும் மாற்றத்தைக் கொண்டுவர முடியும் என்பதால் இப்புதிய நடவடிக்கை தீவிரப்படுத்தப்பட்டுள்ளது.
தேர்தல் களம் சூடுபிடித்துள்ள நிலையில், அகிலேஷ் யாதவின் இந்த அதிரடித் தேர்தல் வியூகம் சமாஜ்வாதி கட்சியினரிடையே புதிய உற்சாகத்தை ஏற்படுத்தியுள்ளது. வாக்குச்சாவடி ரீதியாக வாக்குகளை உயர்த்த வகுக்கப்பட்டுள்ள இந்தத் திட்டம், வரவிருக்கும் தேர்தலில் முக்கியத் திருப்புமுனையாக அமையும் என அரசியல் விமர்சகர்கள் கருத்து தெரிவித்து வருகின்றனர்.