சட்டமன்ற உறுப்பினர்களுக்குத் தொகுதிப் பணிகளை மேற்கொள்வதற்காக அரசு சார்பில் புதிய வாகனங்கள் வழங்கப்படும் எனப் பேரவையில் அறிவிக்கப்பட்டதற்குத் தேமுதிக பொதுச்செயலாளர் பிரேமலதா விஜயகாந்த் தனது கடுமையான கண்டனத்தையும் விமர்சனத்தையும் பதிவு செய்துள்ளார்.
மக்கள் வரிப்பணத்தைச் சரியான முன்னுரிமைகளுக்குப் பயன்படுத்தாமல், ஏற்கனவே வசதியோடு இருக்கும் மக்கள் பிரதிநிதிகளுக்கு மேலும் சலுகைகளை அள்ளித் தருவது எந்த விதத்தில் நியாயமாகும் என்று அவர் சாடியுள்ளார்.
செய்தியாளர்களைச் சந்தித்துப் பேசிய பிரேமலதா விஜயகாந்த், “தமிழகத்தில் ஏற்கனவே 90% எம்.எல்.ஏ.-க்களிடம் சொந்தமாகக் கார்கள் மற்றும் வாகன வசதிகள் இருக்கின்றன. நிலைமை இப்படி இருக்க, அவர்களுக்கு மீண்டும் மக்கள் பணத்தில் கார்கள் வாங்கித் தருவதற்குப் பதிலாக, கடனில் தவிக்கும் ஏழை விவசாயிகளின் விவசாயக் கடன்களை முழுமையாகத் தள்ளுபடி செய்து இருந்தால் நாங்களும் நாட்டு மக்களும் மிகுந்த மகிழ்ச்சி அடைந்திருப்போம்” எனக் காரசாரமாகத் தெரிவித்தார்.
அத்தியாவசியப் தேவைகளான விவசாயக் கடன் தள்ளுபடி, மக்கள் நலத் திட்டங்கள் மற்றும் வாழ்வாதாரப் பிரச்சினைகளில் அரசு கூடுதல் கவனம் செலுத்த வேண்டும் என்பதே சாமானிய மக்களின் எதிர்பார்ப்பாகும்.
ஆனால் அதற்கு மாறாக, மக்கள் பிரதிநிதிகளுக்கான சொகுசுச் சலுகைகளுக்கு முன்னுரிமை அளிப்பது ஏற்புடையதல்ல என்றும் அவர் சுட்டிக்காட்டினார். பிரேமலதா விஜயகாந்தின் இந்த நேரடி விமர்சனமும் கண்டனமும் தற்போது தமிழக அரசியல் களத்திலும் சமூக வலைதளங்களிலும் பெரும் விவாதப் பொருளாக மாறியுள்ளது.