பரந்தூரில் அமையவுள்ள புதிய பசுமை விமான நிலையத் திட்டம் குறித்து சட்டமன்றத்தில் உரையாற்றிய அமைச்சர் ராஜ்மோகன், அதிலுள்ள புவியியல் மற்றும் இயற்கை சார்ந்த பாதிப்புகளைச் சுட்டிக்காட்டி முக்கியக் கருத்துகளைப் பகிர்ந்துள்ளார்.
சட்டப்பேரவையில் விவாதத்தின் போது பேசிய அமைச்சர் ராஜ்மோகன், “பரந்தூர் பகுதி இயற்கையிலேயே ஒரு முக்கிய உறிஞ்சு நிலமாக (Sponge Land) விளங்குவதால், அங்குப் பசுமை விமான நிலையம் அமைத்தால் சென்னை நகருக்குப் பேரழிவை ஏற்படுத்தக்கூடிய வெள்ள அபாயம் உருவாகும் அபாயம் உள்ளது” என எச்சரித்தார்.
மேலும், பழமையான கம்பன் கால்வாய் ஓடும் அந்தப் பகுதியில் புதிய விமான நிலையத்தை அமைப்பது நடைமுறைச் சாத்தியமில்லாத ஒன்று என்று திட்டவட்டமாகத் தெரிவித்த அவர், “அப்பகுதியில் விமான நிலையம் அமைத்தே தீர வேண்டும் என்றால், அதற்குப் பதிலாக மிதந்து செல்லும் வகையிலான ‘வாட்டர் ஏர்போர்ட்’ (Water Airport) வேண்டுமானால் அங்கு அமைக்கலாம்” என்று கிண்டலாக விமர்சித்துப் பேசினார்.
காஞ்சிபுரம் மாவட்டம் பரந்தூரில் இரண்டாவது பெரிய சர்வதேச விமான நிலையம் அமைப்பதற்கு நிலம் கையகப்படுத்தும் பணிகள் மற்றும் உள்ளூர் மக்களின் எதிர்ப்புகள் ஒருபுறம் தீவிரமடைந்து வரும் நிலையில், சட்டப்பேரவையிலேயே அமைச்சர் ராஜ்மோகன் முன்வைத்துள்ள இந்த விமர்சனப் பேச்சு சுற்றுச்சூழல் ஆர்வலர்கள் மற்றும் அரசியல் வட்டாரங்களில் பெரும் பரபரப்பையும் புதிய விவாதங்களையும் கிளப்பியுள்ளது.