தமிழகத்தில் வரவிருக்கும் வடகிழக்கு பருவமழையை எதிர்கொள்ளவும், சென்னை மாநகராட்சிக்குட்பட்ட பகுதிகளில் வெள்ளப் பாதிப்புகள் ஏற்படாமல் தடுத்துப் பாதுகாப்பு நடவடிக்கைகளைத் தீவிரப்படுத்தவும் தமிழக அரசு அதிரடி நடவடிக்கைகளை மேற்கொண்டுள்ளது.
இதன் ஒரு பகுதியாக, சென்னையில் உள்ள 15 மாநகராட்சி மண்டலங்களுக்கும் வடகிழக்கு பருவமழை முன்னெச்சரிக்கை பணிகளைக் கண்காணிக்கவும் ஒருங்கிணைக்கவும் மண்டல வாரியாக மூத்த ஐஏஎஸ் (IAS) அதிகாரிகளை நியமித்து அரசு உத்தரவிட்டுள்ளது.
அதன்படி, திருவொற்றியூர் மண்டலத்திற்கு பாலசுப்பிரமணியம், மணலிக்கு குமரவேல்பாண்டியன், மாதவரத்திற்கு அருண்ராஜ், தண்டையார்பேட்டைக்கு கண்ணன், ராயபுரத்திற்கு ஆஷா அஜித், திரு.வி.க. நகருக்கு கணேசன், அம்பத்தூருக்கு விவேகானந்தன் மற்றும் அண்ணா நகர் மண்டலத்திற்கு காயத்ரி கிருஷ்ணன் ஆகியோர் நியமிக்கப்பட்டுள்ளனர்.
மேலும், தேனாம்பேட்டைக்கு கிறிஸ்துராஜ், கோடம்பாக்கத்திற்கு கோபால சுந்தரராஜ், வளசரவாக்கத்திற்கு விஜய ராணி, ஆலந்தூருக்கு வாகே சங்கேத் பல்வந்த், அடையாறுக்கு செந்தில் ராஜ், பெருங்குடிக்கு மகேஸ்வரி மற்றும் சோழிங்கநல்லூர் மண்டலத்திற்கு பாஸ்கர பாண்டியன் ஆகிய ஐஏஎஸ் அதிகாரிகள் கண்காணிப்பு அலுவலர்களாக நியமிக்கப்பட்டுள்ளனர்.
மழைநீர்க் கால்வாய் தூர்வாரும் பணிகள், நிவாரண முகாம்களைத் தயார் நிலையில் வைத்தல் மற்றும் அவசரகால மீட்பு நடவடிக்கைகளை அந்தந்த மண்டலங்களில் நேரடியாக ஆய்வு செய்து போர்க்கால அடிப்படையில் பணிகளை விரைவுபடுத்த இந்த அதிகாரிகளுக்கு அறிவுறுத்தப்பட்டுள்ளது.
பருவமழை தொடங்குவதற்கு முன்பாகவே மண்டல வாரியாக ஐஏஎஸ் அதிகாரிகளை நியமித்துள்ள தமிழக அரசின் இந்த அதிரடி நடவடிக்கை சென்னைவாசிகளிடையே பெரும் வரவேற்பைப் பெற்றுள்ளது.