‘என்ன விலை’ திரைப்பட விழா மேடையில் பேசிய பிரபல நடிகரும் முன்னாள் சட்டமன்ற உறுப்பினருமான கருணாஸ், மறைந்த முதல்வர் ஜெயலலிதாவின் மறைவுக்குப் பிறகு எடப்பாடி பழனிசாமியை (இபிஎஸ்) எதிர்த்துப் பேசியதால் தன் மீது பல்வேறு பொய் வழக்குகள் தொடரப்பட்டதாக அதிரடிக் குற்றச்சாட்டை முன்வைத்துள்ளார்.
விழாவில் பேசிய அவர், “அரசியல் ரீதியாக இபிஎஸ்-ஐ எதிர்த்த காரணத்திற்காக என் மீது அடுக்கடுக்கான வழக்குகள் பாய்ந்தன. எனது பாஸ்போர்ட் சுமார் ஓராண்டு காலம் நீதிமன்றத்தில் முடக்கி வைக்கப்பட்டது. இன்றளவும் அந்த வழக்குகளை நான் நீதிமன்றத்தில் எதிர்கொண்டு தான் வருகிறேன்.
முன்னாள் எம்.எல்.ஏ மற்றும் திரைத்துறைப் பிரபலமாக இருக்கும் எனக்கே இந்த நிலைமை என்றால், அதிகாரமும் பலமும் இல்லாத சாமானிய மக்களின் நிலைமையை யோசித்துப் பாருங்கள்” என்று மிகவும் ஆவேசமாகக் கேள்வி எழுப்பினார்.
மேலும் பட்டினப்பாக்கம் விவகாரம் குறித்துப் பேசிய அவர், எப்போதும் பாதிக்கப்பட்ட சாமானிய பொதுமக்களின் பக்கமே தான் உறுதியாக நிற்பேன் என்றும் திட்டவட்டமாகத் தெரிவித்தார். திரைத்துறை மேடையைத் தளமாகக் கொண்டு அரசியல் ரீதியான பழிவாங்கல்களைத் தோலுரித்துக் காட்டிய நடிகர் கருணாஸின் இந்தப் பேச்சு சினிமா மற்றும் அரசியல் வட்டாரங்களில் பெரும் பரபரப்பை ஏற்படுத்தியுள்ளது.