விஜய்க்கு ஓட்டு போட ஆசை: தவெக தலைவரைப் புகழ்ந்து தள்ளிய நடிகை காஜல் அகர்வால்!

நடிகர் விஜய் மிகவும் இயல்பான மனிதர் என்றும், மக்களுடனும் சக மனிதர்களுடனும் எளிதாக இணையும் இயல்பு கொண்டவர் என்றும் பிரபல தென்னிந்தியத் திரைநாயகி காஜல் அகர்வால் நெகிழ்ச்சியுடன் தெரிவித்துள்ளார்.

ஊடக நேர்காணல் ஒன்றில் பேசிய அவர், “விஜய் திரையில் மட்டுமல்லாமல், நிஜ வாழ்விலும் தன்னுடன் தானே மிகவும் இயல்பாகவும் வசதியாகவும் இருக்கிறார்; தமிழ்நாட்டில் சென்று வாக்களிக்க முடிந்திருந்தால் நிச்சயமாக நானும் விஜய்க்கு வாக்களித்திருப்பேன், அவரை நினைத்து மிகவும் உற்சாகமாக இருந்தேன்” எனத் தனது மனமார்ந்த வாழ்த்துகளையும் ஆதரவையும் வெளிப்படுத்தியுள்ளார்.

‘துப்பாக்கி’, ‘ஜில்லா’, ‘மெர்சல்’ எனப் பல வெற்றித் திரைப்படங்களில் விஜய்யுடன் இணைந்து நடித்ததன் மூலம் அவருடன் நெருங்கிய நட்புப் பாராட்டி வரும் காஜல் அகர்வால், தற்போது விஜய்யின் அரசியல் வெற்றி குறித்தும் அவரது தனிப்பட்ட ஆளுமை குறித்தும் நெகிழ்ந்து பேசியுள்ளது திரை உலகிலும் ரசிகர்கள் மத்தியிலும் பெரும் கவனத்தைப் பெற்றுள்ளது.

தமிழக வெற்றிக் கழகத் தலைவராகப் பரிணமித்து, மக்கள் ஆதரவோடு ஆட்சி அமைத்துள்ள தமிழக முதலமைச்சர் விஜய்யின் இந்த அரசியல் மாற்றம், திரைத்துறையைச் சேர்ந்த முன்னணிப் பிரபலங்கள் பலரையும் வியப்பில் ஆழ்த்தியுள்ளது.

அந்த வகையில், வெளிமாநிலத்தைச் சேர்ந்த முன்னணி நடிகையான காஜல் அகர்வால், தமக்கு வாக்களிக்கும் உரிமை இருந்தால் விஜய்க்கே வாக்களித்திருப்பேன் என ஓபனாகக் கூறியிருப்பது, விஜய்யின் அரசியல் வருகைக்கும் அவரது நன்மதிப்பிற்கும் திரைத்துறையில் கிடைத்துள்ள பரவலான அங்கீகாரத்தையே உணர்த்துகிறது. அரசியல் மற்றும் சினிமா வட்டாரங்களில் இந்த நேர்காணல் செய்தி தற்போது காட்டுத்தீயாகப் பரவி வருகிறது.

Leave a Comment