சட்டமன்றத்தில் எதிர்க்கட்சியினர் எழுப்பும் நியாயமான கேள்விகளுக்குப் பதிலளிக்க முடியாமல் ஆளும் தவெக அரசு பாட்டுப் பாடியும், பஞ்ச் டயலாக் பேசியும் திசைதிருப்புவதாக எதிர்க்கட்சித் தலைவர் உதயநிதி ஸ்டாலின் எள்ளல் தொனியில் கடுமையாகச் சாடியுள்ளார்.
திருமண விழா ஒன்றில் கலந்துகொண்டு பேசிய அவர், “முன்பெல்லாம் சட்டமன்றத்தில் எதிர்க்கட்சியினர் கேள்வி கேட்டால் ஆளும் அரசு, அமைச்சர்கள் மற்றும் முதலமைச்சர் முறையான பதிலை அளிப்பார்கள். ஆனால், தற்போதைய தவெக ஆட்சியில் கேள்விகளுக்குப் பதில் சொல்வதற்குப் பதிலாகப் பாட்டுப் பாடுகிறார்கள்.
நாம் சட்டமன்றத்தில்தான் இருக்கிறோமா அல்லது ‘சூப்பர் சிங்கர்’, ‘பாட்டு பாடவா’ நிகழ்ச்சிக்கு வந்துவிட்டோமா என்று சந்தேகம் எழும் அளவிற்கு அமைச்சர்களும், எம்.எல்.ஏ-க்களும், ஏன் சபாநாயகர் கூடப் பாட்டுப் பாடுகிறார்; முதலமைச்சர் பஞ்ச் டயலாக் பேசுகிறார்” என்று கிண்டலாக விமர்சித்தார்.
மக்கள் சார்ந்த முக்கியப் பிரச்சினைகள் மற்றும் கொள்கை முடிவுகள் குறித்துச் சட்டமன்றத்தில் காரசாரமான விவாதங்கள் நடைபெற வேண்டிய சூழலில், நிருவாக ரீதியான பதில்களை விடுத்து இதுபோன்ற சினிமாத்தனமான அணுகுமுறையை ஆளும்கட்சி கையாள்வது ஜனநாயக மன்றத்தின் கண்ணியத்தைக் குறைப்பதாகக் குற்றச்சாட்டு முன்வைக்கப்பட்டுள்ளது.
தவெக அரசின் இந்த விசித்திரமான செயல்பாடுகளை மக்கள் உன்னிப்பாகக் கவனித்து வருவதாகச் சுட்டிக்காட்டிய எதிர்க்கட்சித் தலைவரின் இந்த நேரடித் தாக்குதல், சட்டமன்ற நிருவாக முறைமை மற்றும் அரசியல் களத்தில் புதிய காரசார விவாதத்தைக் கிளப்பியுள்ளது.