அரசு மற்றும் அரசு உதவி பெறும் பள்ளிகளில் பயிலும் மாணவ-மாணவிகளின் ஆரோக்கியத்தைப் பேணிப் பாதுகாக்கும் வகையில் ‘இரும்பு கண்மணி’ என்ற புதிய மருத்துவப் பரிசோதனைத் திட்டம் தொடங்கப்பட உள்ளதாக அறிவிக்கப்பட்டுள்ளது. பள்ளி மாணவர்களிடையே அதிகரித்து வரும் இரத்த சோகை (Anemia) பாதிப்பைக் கண்டறிந்து அதற்கு உரிய சிகிச்சை அளிப்பதற்காக இத்திட்டம் கொண்டு வரப்படுகிறது. இதன்படி, பள்ளிகளில் 6, 9 மற்றும் 11-ஆம் வகுப்புகளில் பயிலும் சுமார் 16.6 லட்சம் மாணவர்கள் இத்திட்டத்தின் மூலம் நேரடியாகப் பயன்பெறுவார்கள் எனத் தெரிவிக்கப்பட்டுள்ளது.
மாணவர்களின் உடல்நலனை மேம்படுத்தும் நோக்கில் உருவாக்கப்பட்டுள்ள இத்திட்டம், ரூ.6.37 கோடி மதிப்பீட்டில் செயல்படுத்தப்படும் என அரசு தரப்பில் தெரிவிக்கப்பட்டுள்ளது. இத்திட்டத்தின் கீழ் சிறப்பு மருத்துவக் குழுக்கள் பள்ளிகளுக்கே நேரில் சென்று மாணவர்களுக்கு இரத்த சோகைக்கான பரிசோதனைகளை மேற்கொள்வார்கள். இதில் பாதிப்பு கண்டறியப்படும் மாணவர்களுக்குத் தேவையான சத்து மாத்திரைகள், ஊட்டச்சத்து ஆலோசனைகள் மற்றும் தொடர் மருத்துவக் கண்காணிப்பு ஆகியவை தடையின்றி வழங்கப்படவுள்ளன.
வளரிளம் பருவத்தில் இருக்கும் பள்ளி மாணவ-மாணவிகளின் ஊட்டச்சத்து குறைபாட்டைக் களைந்து, அவர்களின் கவனச் சிதறலைக் குறைத்து படிப்பில் அதிக கவனம் செலுத்த வைப்பதே இத்திட்டத்தின் முதன்மை நோக்கமாகும். தமிழ்நாடு அரசு கல்வி மற்றும் சுகாதாரத் துறையை இணைத்து எடுத்துள்ள இந்த முன்னோடி நடவடிக்கை, பள்ளி மாணவர்களின் ஆரோக்கியத்தில் முக்கிய மாற்றத்தைக் கொண்டு வரும் என்றும், பெற்றோர்கள் மத்தியில் பெரும் வரவேற்பைப் பெறும் என்றும் எதிர்பார்க்கப்படுகிறது.