நெடுஞ்சாலைத் துறை மற்றும் பொதுப்பணித்துறையில் கோரப்பட்ட டெண்டர்கள் மற்றும் ஒதுக்கப்பட்ட திட்டங்கள் குறித்து தீவிரமாக ஆய்வு செய்யப்பட்டு வருவதாகத் தமிழக வெற்றிக் கழகத்தின் பொதுச்செயலாளர் ஆதவ் அர்ஜுனா அறிவித்துள்ளார். செய்தியாளர்களிடம் பேசிய அவர், இந்தத் துறைகளில் கடந்த காலங்களில் நடைபெற்ற பல்வேறு திட்டப் பணிகள், ஒப்பந்தப் ஒதுக்கீடுகள் மற்றும் அதில் நிகழ்ந்துள்ளதாகக் கூறப்படும் விவகாரங்கள் தொடர்பாகவும் விரிவாக ஆராயப்பட்டு வருவதாகத் தெரிவித்துள்ளார்.
இந்த ஆய்வுகளின் அடிப்படையில், நெடுஞ்சாலை மற்றும் பொதுப்பணித் துறைகளின் டெண்டர் நடைமுறைகளில் நடந்துள்ள அத்துமீறல்கள் மற்றும் முறைகேடுகளை முழுமையாக வெளிக்கொண்டு வரும் வகையில் விரைவில் அதிகாரப்பூர்வமான ‘வெள்ளை அறிக்கை’ வெளியிடப்படும் என்று ஆதவ் அர்ஜுனா அதிரடியாகத் தெரிவித்துள்ளார்.
பொது மக்களின் வரிப்பணம் முறையாகப் பயன்படுத்தப்படுகிறதா என்பதை உறுதி செய்வதோடு, அரசாங்கத் திட்டங்களில் வெளிப்படைத்தன்மையைக் கொண்டு வர வேண்டும் என்பதே இந்த வெள்ளை அறிக்கையின் முதன்மை நோக்கம் என்றும் அவர் சுட்டிக்காட்டினார்.
ஆதவ் அர்ஜுனாவின் இந்த வெள்ளை அறிக்கை குறித்த அறிவிப்பு, தமிழக அரசியல் களம் மற்றும் ஒப்பந்ததாரர்கள் வட்டாரத்தில் பெரும் பரபரப்பை ஏற்படுத்தியுள்ளது. அரசின் உள்கட்டமைப்புத் திட்டங்கள் மற்றும் டெண்டர் ஒதுக்கீடுகள் குறித்த விவாதங்கள் சூடுபிடித்துள்ள நிலையில், வெளிவரவிருக்கும் இந்த அறிக்கை பெரும் எதிர்நோக்கையும் அரசியல் ரீதியான தாக்கத்தையும் ஏற்படுத்தும் என எதிர்பார்க்கப்படுகிறது.