சமையல் எரிவாயு (LPG) சிலிண்டர் நுகர்வோருக்கான eKYC (மின்னணு வாடிக்கையாளர் விவர சரிபார்ப்பு) நடைமுறையை முடிப்பதற்கான காலக்கெடு வரும் ஆகஸ்ட் 23-ஆம் தேதி வரை நீட்டிக்கப்பட்டு அதிகாரப்பூர்வமாக அறிவிக்கப்பட்டுள்ளது. போலி இணைப்புகளைத் தவிர்ப்பதற்கும், அரசு வழங்கும் மானியத் தொகைகள் எவ்வித தடங்கலுமின்றித் தகுதியான பயனாளிகளின் வங்கிக் கணக்குகளுக்கு நேரடியாகச் சென்று சேர்வதை உறுதி செய்வதற்கும் இந்த eKYC சரிபார்ப்பு முறை அவசியமாக்கப்பட்டுள்ளது.
எனவே, இதுவரை இச்செயல்முறையை நிறைவு செய்யாத வாடிக்கையாளர்கள் இந்த வாய்ப்பைப் பயன்படுத்தி உடனடியாகப் பதிவை முடிக்க அறிவுறுத்தப்படுகிறார்கள்.
வாடிக்கையாளர்களின் வசதிக்காக இந்தச் சரிபார்ப்பு முறையை ஆன்லைன் மற்றும் நேரிடி முறைகள் என இரண்டின் மூலமாகவும் மேற்கொள்ள வழிவகை செய்யப்பட்டுள்ளது. எரிவாயு நிறுவனங்களின் அதிகாரப்பூர்வ மொபைல் செயலிகள் மற்றும் இணையதளங்கள் வாயிலாக வீட்டிலிருந்தபடியே ஸ்மார்ட்போன் மூலம் ஆன்லைனில் eKYC சரிபார்ப்பை எளிதாகச் செய்து கொள்ளலாம்.
ஆன்லைன் வசதியைப் பயன்படுத்த இயலாதவர்கள், தங்களின் சமையல் எரிவாயு விநியோக முகவர் (LPG Dealer) அலுவலகத்திற்கு நேரில் சென்றும் ஆதார் மற்றும் எரிவாயு இணைப்பு எண்களைச் சமர்ப்பித்து இந்த நடைமுறையைப் பூர்த்தி செய்ய முடியும்.
குறிப்பிட்ட காலக்கெடுவுக்குள் eKYC நடைமுறையை முடிக்கத் தவறினால், எதிர்காலத்தில் சிலிண்டர் முன்பதிவு செய்வதிலும் அரசு அளிக்கும் மானியம் பெறுவதிலும் சிக்கல்கள் ஏற்பட வாய்ப்புள்ளதாக எச்சரிக்கப்பட்டுள்ளது. எனவே, பொதுமக்களும் எல்பிஜி நுகர்வோரும் கடைசி நேரப் பதற்றத்தையும்
கூட்ட நெரிசலையும் தவிர்க்கும் பொருட்டு, வழங்கப்பட்டுள்ள இந்த கூடுதல் கால அவகாசத்தைப் பயன்படுத்தி ஆகஸ்ட் 23-ஆம் தேதிக்குள் தங்களது eKYC நடைமுறையை விரைந்து நிறைவு செய்து பயன்பெறுமாறு கேட்டுக்கொள்ளப்படுகிறார்கள்.