நீட் வினாத்தாள் கசிவு மற்றும் கல்வித்துறைச் சீர்திருத்தங்களை வலியுறுத்தி டெல்லி ஜந்தர் மந்தரில் ‘காக்ரோச் ஜனதா கட்சி’ (CJP) அமைப்பின் தலைமையில் நடைபெற்று வந்த வரலாற்றுச் சிறப்புமிக்க மாணவர் போராட்டம் மாபெரும் வெற்றியில் முடிவடைந்துள்ளது. மாணவர்களின் தொடர் அழுத்தத்திற்குப் பணிந்து மத்தியக் கல்வி அமைச்சர் தர்மேந்திர பிரதான் தனது பதவியை ராஜினாமா செய்துள்ளார். இதனைத் தொடர்ந்து, நாடு தழுவிய அளவிலான தங்களது போராட்டத்தை உடனடி அமலுக்கு வரும் வகையில் திரும்பப் பெறுவதாக CJP அமைப்பு அதிகாரப்பூர்வமாக அறிவித்துள்ளது.
டெல்லியில் மத்திய ஜே.பி. நட்டா மற்றும் ஜிதேந்திர சிங் ஆகியோருடன் CJP பிரதிநிதிகள் நடத்திய இறுதி கட்டப் பேச்சுவார்த்தையில் மாணவர்களின் அனைத்து முக்கியமான கோரிக்கைகளையும் மத்திய அரசு முழுமையாக ஏற்றுக்கொண்டதாக அறிவிக்கப்பட்டது. கல்வி அமைச்சரின் ராஜினாமாவைத் தொடர்ந்து, நாடு முழுவதும் போராட்டத்தில் ஈடுபட்ட மாணவர்கள் மற்றும் இளைஞர்கள் மத்தியில் பெரும் உற்சாகமும் கொண்டாட்டமும் ஏற்பட்டுள்ளது.
மத்திய அரசு ஏற்றுக்கொண்ட கோரிக்கைகளின்படி, நீட் வினாத்தாள் கசிவு மற்றும் தேர்வு குளறுபடிகளால் மனமுடைந்து தற்கொலை செய்துகொண்ட மாணவர்களின் குடும்பங்களுக்கு அதிகபட்ச சாத்தியமான இழப்பீடு (Maximum Possible Compensation) வழங்கப்படும் என உறுதியளிக்கப்பட்டுள்ளது. பாதிக்கப்பட்ட குடும்பங்களின் துயரத்தைத் துடைக்கும் வகையில் இந்த முடிவு எட்டப்பட்டுள்ளது.
எப்.ஐ.ஆர் வாபஸ் மற்றும் 5 அம்ச சீர்திருத்தங்கள்: மாணவர் சக்தியின் வரலாற்றுச் சாதனை!
மேலும், இந்த போராட்டத்தின் போது மத்திய அரசு மற்றும் என்.டி.ஏ (NDA) ஆளும் மாநில அரசுகளால் மாணவர்கள் மற்றும் ஆதரவாளர்கள் மீது பதிவு செய்யப்பட்ட அனைத்து எப்.ஐ.ஆர் (FIR) வழக்குகளும் நிபந்தனையின்றி உடனடியாகத் திரும்பப் பெறப்படும் எனக் தெரிவிக்கப்பட்டுள்ளது. எதிர்காலத்திலும் இந்தப் போராட்டத்தில் பங்கேற்ற யாருக்கும் எதிராக எவ்வித சட்ட நடவடிக்கையோ அல்லது பழிவாங்கும் நடவடிக்கையோ எடுக்கப்படாது என்றும் அரசுத் தரப்பில் அதிகாரப்பூர்வமாக உறுதியளிக்கப்பட்டுள்ளது.
தேர்வு அமைப்பில் வெளிப்படைத்தன்ையைக் கொண்டுவர CJP முன்வைத்த 5 அம்சத் தேர்வுச் சீர்திருத்த சாசனத்தை (5-Point Exam Reform Charter) மத்திய அரசு பரிசீலிக்க ஒப்புக்கொண்டுள்ளது. இந்தச் சீர்திருத்தங்களை நாட்டின் கல்வி அமைப்பில் அமல்படுத்துவது குறித்து மத்திய அரசு, CJP நிர்வாகிகளுடன் மேலும் பல சுற்று பேச்சுவார்த்தைகளை நடத்தி இறுதி வடிவம் கொடுக்கும் என்றும் தெரிவிக்கப்பட்டுள்ளது.
“மக்களாட்சியும் மாணவர் சக்தியும் வென்றுள்ளது” (Chhatra Shakti Zindabad) எனக் குறிப்பிட்டுள்ள CJP அமைப்பின் தலைவர்கள், அமைதியான மற்றும் உறுதியான போராட்டத்தின் மூலம் எப்பேர்ப்பட்ட அதிகாரத்தையும் பணிய வைக்க முடியும் என்பதை இந்திய இளைஞர்கள் நிரூபித்துக் காட்டியுள்ளதாக நெகிழ்ச்சியுடன் தெரிவித்துள்ளனர். அரசின் இந்த அறிவிப்பைத் தொடர்ந்து ஜந்தர் மந்தரில் இருந்து மாணவர்கள் தங்களது சொந்த ஊர்களுக்குத் திரும்பத் தொடங்கியுள்ளனர்.