ஈரானை அழிப்பது குறித்துப் பேசி வரும் அமெரிக்க முன்னாள் அதிபர் டொனால்ட் டிரம்பிற்குப் பதிலடி கொடுக்கும் விதமாக, ஜிம்பாப்வேயில் உள்ள ஈரான் தூதரகம் தெலுங்கு நடிகர் பாலகிருஷ்ணா நடித்த திரைப்படக் காட்சியைத் தனது எக்ஸ் (X) சமூக வலைதளப் பக்கத்தில் பகிர்ந்துள்ளது.
58 வினாடிகள் கொண்ட அந்தக் காட்சியுடன் பதிவிட்டுள்ள ஈரான் தூதரகம், “டிரம்ப் ஈரானை அழிப்பதைப் பற்றிப் பேசுகிறார், ஆனால் ஈரான் ஒன்றும் பாதுகாப்பற்ற நாடு அல்ல என்பதை அவர் நன்கு அறிவார்; அவர்கள் சமீபகாலமாக ஹாலிவுட் படங்களுக்குப் பதிலாக பாலிவுட்/இந்தியப் படங்களைப் பார்க்கிறார்கள் என்று கேள்விப்பட்டோம்” எனக் குறிப்பிட்டு டிரம்ப் நிருவாகத்தைக் கிண்டல் செய்யும் வகையில் சாடியுள்ளது.
சர்வதேச இராஜதந்திர மோதல்களுக்கு மத்தியில், சினிமா காட்சிகளைப் பயன்படுத்தி வல்லரசு நாட்டின் தலைவருக்கு ஈரான் தூதரகம் இத்தகைய இணையவழி பதிலடி கொடுத்திருப்பது உலக அளவில் பெரும் கவனத்தையும் விவாதத்தையும் ஈர்த்துள்ளது.
மத்திய கிழக்கு பிராந்தியத்தில் போர் மேகங்கள் சூழ்ந்துள்ள தீவிர அரசியல் சூழலில், ஒரு நாட்டின் தூதரகம் சினிமா மீம்கள் மற்றும் அதிரடி ஆக்ஷன் காட்சிகளை இராஜதந்திரப் பிரசாரக் கருவியாகப் பயன்படுத்துவது நவீன டிஜிட்டல் அரசியலின் விசித்திரமான போக்கை உணர்த்துகிறது.
அமெரிக்காவின் இராணுவ அச்சுறுத்தல்களையும் மேலாதிக்கப் பேச்சுகளையும் அசட்டையாக எதிர்கொள்கிறோம் என்பதைக் காட்டவே ஈரான் இத்தகைய உத்தியைக் கையாள்கிறது. அதேவேளையில், இரு நாடுகளுக்கும் இடையிலான பகைமையும், அதன் விளைவாக எழும் போர் அச்சுறுத்தல்களும் உலக அமைதிக்கு பெரும் அச்சுறுத்தலாக உருவெடுத்துள்ள சூழலில், இத்தகைய கிண்டல் பதிவுகள் போரின் தீவிரத்தைக் குறைத்து மதிப்பிடுவதாக மாறுமோ என்ற கவலையும் எழுகிறது.
சர்வதேச விவகாரங்களை வெறும் சமூக வலைதள மோதல்களாகச் சுருக்காமல், இரு தரப்பும் அமைதியை நோக்கிய தீவிரமான இராஜதந்திரப் பேச்சுவார்த்தைகளில் ஈடுபட வேண்டும் என்பதே பன்னாட்டு அரசியல் ஆய்வாளர்களின் முதன்மை கருத்தாகும்.