மானிய விலையில் சமையல் எரிவாயு (எல்பிஜி) சிலிண்டர்களைப் பெறுவதற்கு பயோமெட்ரிக் ஆதார் சரிபார்ப்பைக் கட்டாயமாக்கும் மத்திய அரசின் முடிவுக்கு எதிராகத் தாக்கல் செய்யப்பட்ட மனுவை விசாரித்த டெல்லி உயர் நீதிமன்றம், இது தொடர்பாக விளக்கமளிக்கக் கோரி மத்திய அரசுக்கு நோட்டீஸ் அனுப்ப உத்தரவிட்டுள்ளது.
அக்டோபர் 1 முதல் அமலுக்கு வரும் வகையில், மானிய விலை எல்பிஜி சிலிண்டர் பெற விரும்புவோர் பயோமெட்ரிக் ஆதார் சரிபார்ப்பை மேற்கொள்வது கட்டாயம் என மத்திய அரசு அறிவித்திருந்தது. அரசின் இந்த உத்தரவுக்கு எதிராகவும், இந்த விதியை ரத்து செய்யக் கோரியும் டெல்லி உயர் நீதிமன்றத்தில் பொதுநல வழக்கு ஒன்று தொடரப்பட்டது.
அந்த மனுவில், “பயோமெட்ரிக் ஆதார் சரிபார்ப்பு முறை நடைமுறைப்படுத்தப்படும் போது, குறிப்பாகப் பார்வைக் குறைபாடு உள்ள மாற்றுத்திறனாளிகள் மற்றும் முதியோர்களுக்கு இது மிகப்பெரிய சிரமத்தையும் நடைமுறைச் சிக்கல்களையும் ஏற்படுத்துகிறது” என்று சுட்டிக்காட்டப்பட்டிருந்தது. மேலும், இத்தகைய நிபந்தனைகளால் தகுதியான பயனாளிகளுக்கு மானியம் கிடைப்பதில் முட்டுக்கட்டை ஏற்படும் என்றும் தெரிவிக்கப்பட்டது.
இந்த மனுவை விசாரணைக்கு எடுத்துக்கொண்ட நீதிமன்றம், பார்வைக் குறைபாடு உடையவர்களின் நலன் மற்றும் எழுப்பப்பட்டுள்ள கேள்விகளைக் கருத்தில் கொண்டு, இது தொடர்பாகப் பதிலளிக்குமாறு மத்திய அரசுக்கு நோட்டீஸ் அனுப்பியதுடன், உரிய விளக்கம் அளிக்குமாறும் உத்தரவிட்டுள்ளது. எல்பிஜி சிலிண்டர் மானியம் பெற பயோமெட்ரிக் கட்டாயமாக்கப்பட்ட சூழலில், நீதிமன்றத்தின் இந்த அதிரடி நடவடிக்கை பயனாளிகள் மற்றும் மாற்றுத்திறனாளிகள் மத்தியில் பெரும் கவனத்தைப் பெற்றுள்ளது.