நாட்டில் கோதுமை உற்பத்தி கணிசமாக அதிகரித்துள்ள நிலையில், கடந்த 4 ஆண்டுகளாக அமலில் இருந்த கோதுமை ஏற்றுமதி மீதான தடையை மத்திய அரசு அதிகாரப்பூர்வமாக நீக்கி உத்தரவிட்டுள்ளது. உள்நாட்டு சந்தையில் கோதுமை வரத்து அதிகரிப்பு மற்றும் விவசாயிகளின் நலனைக் கருத்தில் கொண்டு இந்த முக்கிய முடிவு எடுக்கப்பட்டுள்ளது.
நாடு முழுவதும் 2025-26ஆம் நிதியாண்டில் 12 கோடி டன் கோதுமை உற்பத்தி செய்யப்பட்டுள்ளதாக மத்திய அரசின் புள்ளிவிவரங்கள் தெரிவிக்கின்றன.
சாதனை அளவிலான இந்த உற்பத்தியின் காரணமாக உள்நாட்டுச் சந்தையில் கோதுமையின் விலை கடுமையாகச் சரியும் சூழல் உருவானது. சந்தையில் விலைச் சரிவைக் கட்டுப்படுத்தி, விவசாயிகளுக்கு நியாயமான விலை கிடைப்பதை உறுதிசெய்யும் நோக்கில், கடந்த 4 ஆண்டுகளாக நீடித்து வந்த ஏற்றுமதித் தடையை நீக்க மத்திய அரசு நடவடிக்கை எடுத்துள்ளது.
மத்திய அரசின் இந்தத் தடை நீக்க அறிவிப்பானது, விவசாயிகளுக்கும் ஏற்றுமதியாளர்களுக்கும் பெரும் மகிழ்ச்சியையும் நிம்மதியையும் அளித்துள்ளது.
சர்வதேசச் சந்தையில் இந்தியக் கோதுமைக்கான தேவை அதிகரித்து வருவதால், அரசின் இந்த அதிரடி நடவடிக்கை நாட்டின் விவசாயப் பொருளாதாரத்தை அடுத்தகட்டத்திற்கு எடுத்துச் செல்ல உதவும் எனப் பொருளாதார வல்லுநர்கள் கருத்து தெரிவித்துள்ளனர்.