முதலமைச்சர் விஜய் தலைமையிலான தமிழக வெற்றிக் கழக அரசு ஆட்சிக் கட்டிலில் அமர்ந்து 100 நாட்களை நிறைவு செய்துள்ள நிலையில், திமுக முன்னாள் அமைச்சர் மா.சுப்பிரமணியன் தவெக அரசின் செயல்பாடுகளைக் கடுமையாக விமர்சித்துள்ளார்.
தவெகவின் 100 நாள் ஆட்சி குறித்துச் செய்தியாளர்களிடம் பேசிய அவர், இணையதளங்கள் மற்றும் சமூக வலைதளங்களில் பரவி வரும் விமர்சனப் பதிவுகளைச் சுட்டிக்காட்டித் தன் கண்டனத்தைப் பதிவு செய்தார்.
அவர் பேசுகையில், “முதலமைச்சர் விஜய் ஆட்சிக்கு வந்து 100 நாட்கள் ஆகிறது. சமூக வலைதளங்களில் ‘சுறா படம் 100 நாட்கள் ஓடியது என்று சொன்னால் அதை யாராவது ஏற்றுக்கொள்வார்களா?’ என்ற பதிவு பரவி வருகிறது.
அந்தப் படம் எவ்வளவு மோசமோ, இந்த ஆட்சியின் செயல்பாடும் அதே போலத்தான் இருக்கிறது” என்று சாடினார். திரையுலகில் தோல்வியடைந்த திரைப்படத்துடன் ஆட்சியின் செயல்பாடுகளை ஒப்பீடு செய்து அவர் தெரிவித்த கருத்து அரசியல் வட்டாரத்தில் பெரும் அதிர்வலையை ஏற்படுத்தியுள்ளது.
மக்கள் நலத் திட்டங்களைச் செயல்படுத்துவதில் அரசு மெத்தனப் போக்குடன் நடந்து கொள்வதாகவும், வாக்குறுதிகளை நிறைவேற்றாமல் வெறும் விளம்பர அரசியல் மட்டுமே செய்து வருவதாகவும் அவர் குற்றம்சாட்டினார். திமுக முன்னாள் அமைச்சர் மா.சுப்பிரமணியனின் இந்த காரசாரமான ‘சுறா பட ஒப்பீடு’ விமர்சனம், தமிழக அரசியல் தளத்திலும் சமூக வலைதளங்களிலும் பெரும் விவாதப் பொருளாக மாறியிருப்பதோடு, அரசியல் கட்சித் தொண்டர்களிடையே பரவலாகப் பகிரப்பட்டும் வருகிறது.