எதிர்க்கவில்லை… ஏற்கிறேன்!: பிரேமலதா கருத்து குறித்துத் திருமாவளவன் விளக்கம்!

தேமுதிக மீது குற்றம் சுமத்துவது தனது நோக்கமல்ல என்று விடுதலைச் சிறுத்தைகள் கட்சியின் தலைவர் தொல். திருமாவளவன் செய்தியாளர்கள் சந்திப்பில் தெளிவுபடுத்தியுள்ளார்.

அவர் கூறுகையில், “திமுக கூட்டணியில் தேமுதிகவிற்கு 10 இடங்கள் ஒதுக்கப்பட்ட போது, அதை முதலில் வரவேற்று அதன் நியாயத்தைப் பேசிய முதல் நபர் நான்தான்.

திமுக கூட்டணியில் இருந்த சில கட்சிகள் வெளியேறியதற்கான காரணங்கள் குறித்து ஆய்வு செய்தபோது, திடீரெனக் கூட்டணிக்கு வந்த தேமுதிகவிற்கு 10 தொகுதிகள் வழங்கப்பட்டதும் இந்த முடிவுக்கு ஒரு முக்கியக் காரணமாக அமைந்திருக்கலாம் என்ற என் கருத்தைத் தெரிவித்தேன்.

ஆனால், அதை நான் குறைகூறுவதாகத் தேமுதிக பொதுச்செயலாளர் பிரேமலதா விஜயகாந்த் தவறாகப் புரிந்துகொண்டார். அவருடைய கருத்தை நான் எந்த விதத்திலும் எதிர்க்கவில்லை, மாறாக முழுமையாக ஏற்கிறேன்; கருத்து கருத்தாகவே இருக்கட்டும்” என்று விளக்கமளித்தார்.

தேர்தல் களத்தில் கூட்டணிக் கட்சிகளிடையே தொகுதிப் பங்கீடு மற்றும் இட ஒதுக்கீடு தொடர்பாக எழுந்துள்ள பல்வேறு விவாதங்களுக்கு மத்தியில், திருமாவளவன் அளித்துள்ள இந்த நிதானமான மற்றும் சமரசப்பூர்வமான விளக்கம், அரசியல் வட்டாரத்தில் நிலவிய சர்ச்சைகளுக்கு முற்றுப்புள்ளி வைக்கும் விதமாக அமைந்துள்ளது.

Leave a Comment