சிறையில் அடைக்கப்பட்டுள்ள பாகிஸ்தான் முன்னாள் பிரதமரும், 1992-ஆம் ஆண்டு உலகக்கோப்பை வென்ற அணியின் கேப்டனுமான இம்ரான் கானுக்கு உரிய மருத்துவ சிகிச்சையும் மனிதநேய அடிப்படையிலான பராமரிப்பும் வழங்கப்பட வேண்டும் எனக் கோரி சர்வதேச கிரிக்கெட் உலகின் 21 முன்னாள் கேப்டன்கள் பாகிஸ்தான் பிரதமர் ஷாபாஸ் ஷெரீப்பிற்குத் தீவிரக் கடிதம் எழுதியுள்ளனர். இந்தியாவின் கபில்தேவ், சுனில் கவாஸ்கர், திலீப் வெங்சர்க்கார் மற்றும் ஆஸ்திரேலியாவின் ஆலன் பார்டர், கிளைவ் லாயிட், அர்ஜுனா ரணதுங்கா உள்ளிட்ட பல கிரிக்கெட் ஆளுமைகள் இந்தக் கடிதத்தில் கையெழுத்திட்டுள்ளனர்.
இம்ரான் கானை மருத்துவமனைக்கு மாற்றிய பிறகு, அவரது சொந்த மருத்துவர்கள் அடங்கிய மருத்துவக் குழுவைக் கொண்டு முழுமையான பரிசோதனை செய்ய வேண்டும் என்றும், வாரம் ஒருமுறை குடும்பத்தினர் சந்திப்பதை இடையூறின்றி அனுமதிக்க வேண்டும் என்றும் பாகிஸ்தான் உச்ச நீதிமன்றம் உத்தரவிட்டிருந்தது. இருப்பினும், அரசு நியமித்த மருத்துவர்கள் சில மணி நேரங்களிலேயே அவரைப் பரிசோதித்துத் திரும்பச் சிறைக்கு அனுப்பியதாகவும், நீதிமன்ற உத்தரவு முறையாகப் பின்பற்றப்படவில்லை என்றும் அவர்கள் தங்களது குற்றச்சாட்டாக முன்வைத்துள்ளனர்.
குறிப்பாக, இம்ரான் கானின் வலது கண் பார்வையில் பாதிப்பு ஏற்பட்டுள்ளதாகக் கூறப்படும் நிலையில், உச்ச நீதிமன்ற உத்தரவின்படி அவரது சொந்த மருத்துவர்கள் அடங்கிய சுயாதீனக் குழு பரிசோதனையை முடிக்க அனுமதிக்க வேண்டும் என்றும், பரிந்துரைக்கப்படும் சிகிச்சைகளைத் தடையின்றி வழங்க வேண்டும் என்றும் கிரிக்கெட் உலகின் முன்னணி நட்சத்திரங்கள் ஒன்றுதிரண்டு வலியுறுத்தியுள்ளது சர்வதேச அளவில் பெரும் கவனத்தை ஈர்த்துள்ளது.