தமிழ்நாட்டின் வருவாயைப் பெருக்குவதற்கும், நிதி ஆதாரங்களை மேலும் வலுப்படுத்துவதற்கும் தமிழ்நாடு அரசால் அமைக்கப்பட்ட நிபுணர் குழுவினர், முதலமைச்சர் விஜய் அவர்களை நேரில் சந்தித்து விரிவான ஆலோசனை நடத்தினர்.
நாட்டின் முக்கியப் பொருளாதார நிபுணரும் திட்டக் குழுவின் முன்னாள் துணைத் தலைவருமான மாண்டேக் சிங் அலுவாலியா தலைமையில் நடைபெற்ற இந்தக் கூட்டத்தில், மாநிலத்தின் பொருளாதார வளர்ச்சியை விரைவுபடுத்துவதற்கான பல்வேறு உத்திகள் மற்றும் புதிய திட்டங்கள் குறித்து ஆலோசிக்கப்பட்டது.
சுமார் 30 நிமிடங்களுக்கும் மேலாக நடைபெற்ற இந்த முக்கியச் சந்திப்பின் போது, மாநிலத்தின் நிதி பற்றாக்குறையைக் குறைப்பது, புதிய வருவாய் வாய்ப்புகளைக் கண்டறிவது மற்றும் பல்வேறு துறைகளில் முதலீடுகளை ஈர்ப்பது தொடர்பாக அலுவாலியா தலைமையிலான குழுவினர் பல முக்கியப் பரிந்துரைகளை முன்வைத்தனர்.
மாநிலத்தின் நிதி நிர்வாகத்தை மேம்படுத்தவும், பொருளாதார ரீதியாகத் தமிழ்நாட்டை அடுத்தகட்டத்திற்கு எடுத்துச் செல்லவும் அரசு மேற்கொண்டு வரும் நடவடிக்கைகளின் ஒரு பகுதியாக இந்த உயர்மட்ட ஆலோசனை அமைந்தது.
இந்தச் சந்திப்புக்குப் பிறகு செய்தியாளர்களைச் சந்தித்த அதிகாரிகள், இக்கூட்டம் மிகவும் பயனுள்ளதாகவும் தொலைநோக்குப் பார்வையுடனும் அமைந்ததாகத் தெரிவித்தனர். மாநிலப் பொருளாதாரத்தை மீட்டெடுக்க அரசு மேற்கொண்டு வரும் இந்தத் தீவிர முயற்சிகள் வர்த்தக மற்றும் அரசியல் வட்டாரங்களில் பெரும் கவனத்தைப் பெற்றுள்ளன.